على باب اللجنة..

      في مدرسة علي بن أبي طالب الابتدائية, أمام باب لجنة رقم 44... كنت واقف قدام الباب و خلاص أنا اللي عليا الدور و مبسوط و كده.. فإذا بهذه الأحداث تأخذ مجراها..

رجل بدقن: عمر بن الخطاب مين؟ احترم نفسك.. 

شاب أسمر: مالك يا عم..

الرجل أبو دقن: أنا سامعك بتقول ايه.. خليك ف حالك أحسنلك.. انت فاهم ولا لأ.. 

الشاب الأسمر: أنا كلمتك يا عم انت..

الزجل أبو دقن: انت كذاب و أنا سامعك بتقول عمر بن الخطاب.. انت اش فهمك؟؟ 

و تعالت الأصوات... 

الشاب اللي واقف ورايا: (بعصبية) يقول اللي يقوله.. انت تخرس خالص.. (و يتعالى صوته) هو كل واحد بدقن هييجي يقولي قال الله و قال الرسول.. و هو بس اللي بيفهم في الدين و السنى.. اتكلم ياض قول اللي انت عايزه.. جاتكوا البلاوي ركبتوها و خربتوها.. الواد يقووول اللي هو عايييزه.. قول ياااااض...  .. و  اذا به يتحول الى ثور هائج و يبدأ وصلة سباب و زعيق و الناس تحوش..

و يتدخل مجند و يحتضن الشاب الغاضب و يحتوي ثورته..

و أنا أطبطب عليه.. و أقوله اهدى مش كده.. ده راجل كبير.. 

و ينصرف الرجل أبو دقن بعد ظهور قيادات من الشرطة و الجيش لعدم تفاقم الوضع.. 

و يأتي ضابط و يأخذ الشاب الأسمر الذي قال عمر بن الخطاب.. الى لا أدري أين!!

و يأتي ضابط اخر و يأخذ الشاب اللي كان واقف ورايا و يدخله مباشرة الى اللجنة ليدلي بصوته و ينصرف احتواءا للموقف..

في هذه الأثناء.. واحد ابن تيت.. جه من ورا و أنا سرحان و دخل اللجنة قبلي.. ف اتغظت أوي أوي أوي الصراحة!!  :-(

S for Shiko