كنت رئيسا ..الحلقة الثانية

(الحلقة الثانية)

المكان: 

في أحد أركان الحديقة الواسعة.. أمام أحد الأشجار الضخمة.

الساعة:

التاسعة صباحا.

حالة الجو:

الشمس مشرقة و الهواء نقي

المشهد الثاني:

الرجل الغامض يقف بجانبه البلوجر و يتمعنوا النظر الى أحد الأشجار الضخمة..

الرجل: شايف الشجرة دي.

شريف: أيوا.. مالها.

الرجل: شوف الورق اللي جوه.. و الورق اللي بره..

شريف: حلوين و شكلهم صحي..

الرجل: تفتكر ليه الشجرة دي شكلها صحي كده و مخضرة؟

شريف: عشان الجنايني بيعتني بيها..

الرجل: تفتكر الجنايني بيغسل الشجرة دي ورقة ورقة؟

شريف: أكيد لأ.

الرجل: أمال بيعمل ايه؟

شريف: بيرش الأرض.

الرجل: قصدك بيركز على الجذور.. صح؟

شريف: أيوا كلام منطقي جدا.

الرجل: بيحط الجدول.. و يروي في المواعيد المحددة.. عشان الشجرة تستفيد.. و جذورها تقوى.. و تتغذى كويس و فروعها تزيد.. مش كده ولا ايه؟؟

شريف: كلام  منطقي..

الرجل: أهو ده بقى اللي كنت بأحاول أعمله.. كنت بأحاول أغذي الجذور.. عشان مهما عملنا في الشكل من بره.. لو الجذور مش قوية.. الشجرة هتموت..مش كده ولا ايه؟؟

شريف: كده يا فندم..

الرجل: ايه رأيك بقى لو فيه نباتات ضارة في الأرض حوالين الشجرة؟ .. ايه اللي هيحصل؟

شريف: هتاخد الغذاء بتاع الشجرة.. خدناها في خمسة ابتدائي؟؟ هاهاها ( و يضحك.. فينظر اليه الرجل نظرة استحقار.. فيصمت ) احم.. كمل يا فندم..

الرجل: و مهما الجنايني يسقي..؟

شريف: الشجر ميكبرش و يموت.

الرجل: ما بالك بقى لو الجنايني.. راجل كبير و بيشوف بالعافية.. وقرر يعتمد على ولاده..

شريف: ولاده؟؟

الرجل: و ما بالك لو ولاده دول طلعوا معندهومش ضمير.. و مش بيقولوا ان فيه نباتات ضارة موجودة؟؟

شريف: يبقي مجهود الجنايني هيروح هدر..

الرجل: أهو ده حال البلد في العشر سنوات الأخيرة..

شريف: طب ليه منجبش جنايني جديد..

الرجل: جيت ع الجرح يا شيكو..

شريف: شيكو؟ انت عرفت ازاى ان اسمي شيكو؟!

الرجل: "S for Shiko"... انا عارف كل حاجة عنك..

شريف: ازاى؟

الرجل: انت فاكرنا بنلعب ولا ايه؟ (و يضحك ضحكة شريرة)

شريف: خمس فترات رئاسة مش كتير؟ مزهقتش طيب؟!

الرجل: زهقت و تعبت.

شريف: طب ما مشيتش ليه؟

الرجل: عشان مكنش فيه بديل.

شريف: مش ممكن..

الرجل: انت بتتكلم كده عشان انت بعيد عن الموضوع..

شريف: طيب ما تدخلني في الموضوع.. فهمني لو أنا مش فاهم..

الرجل: مكنش ينفع يبقى في بديل..

شريف: ليه؟

الرجل: اللي ماسكين الليلة كانوا فرحانين بيا.

شريف: و انت كنت فرحان بنفسك؟؟..

الرجل: انت ازاي بتكلمني كده؟ انتوا ليه بتعملوا فيا كده؟

شريف: عشان انت متهم انك انسان أناني.. و فضلت السلطة و مصلحتك الشخصية على مصلحة رعاياك..

الرجل: (بغضب) انت نسيت نفسك ولا ايه؟

شريف: (بثبات) أنا بأنقلك اللي في قلوب رعاياك السابقين..

الرجل: أنا حاولت بس محدش ساعدني.. اللي ماسكين الليلة كانوا عارفين اني زهقت.. بس مكنش قدامهم حد تاني يقدر يملى المكان اللي هيفضى من بعدي.. المصلحة العامة اقتدت كده..

شريف: كلمني عن حاشية المنتفعين بتوع الحزب اللي كان الحاكم..

الرجل: (يستعدل نظارته الطبية) دول خونة.. و ضيعوا البلد.. خانوا ثقة الرئيس فيهم..

شريف: تفتكرايه سبب الفساد اللي تفشى في الحزب الحاكم و الحكومة عامة..؟

الرجل: طول مدة الرئاسة.. و مفيش حد بيحاسب حد.. أنا كنت عارف ان فيه فساد.. بس أنا فعلا مصدوم من الكم.. مكنتش متصور انه واصل للدرجة دي..

شريف: و ليه الرئيس ميحاسبش الناس دي لو هو عارف ان فيه فساد؟

الرجل: مين قال كده؟ هشام طلعت.. حسام أبو الفتوح.. أحمد شوبير.. و غيرهم.. مش كل دول اتحاسبوا ؟! و النبي بلاش أسئلة ملهاش أسس سليمة..

شريف: طيب.. صفوت الشريف.. فتحي سرور.. زكريا عزمي.. و غيرهم و غيرهم..

الرجل: للأسف من الناس اللي اتصدمت فيهم.. واضح ان رئيسك كان نايم في السنين العشرة الأخيرة.. فالفساد بقى متفشي.. و كمان المصيبة انه كان تحت رعاية شلة المنتفعين..

شريف: نايم..طيب.. حضرتك فطرت ولا لسه؟؟

الرجل: الساعة عشرة و نص.. ده ميعاد الفطار بتاعي.. تعالى افطر معايا جوة.

شريف: كلي فضول أعرف حضرتك بتفطر ايه..

الرجل: يابني أنا انسان عادي خالص.. بأفطر زي ما كل الناس بتفطر..

شريف: طب يلا بينا عشان حضرتك جوعتني..

و دخل الرجل و البلوجر الى داخل المبنى ليتناولوا وجبة الافطار

TO BE CONTINUED))

الحلقة القادمة.. يتحدث الرئيس عن جماعة الاخوان و رأيه فيهم.. كما يتحدث عن الشرطة و أدائها.. و ترقب ما يقوله عن أبو تريكة و الانتخابات الحالية.. فقط على..WINDSOFTHOUGHTS.BLOGSPOT.COM

S for Shiko