الحرية و الإنحلال

الحرية.. و الإنحلال

ما أجمل ان يتحلى المرء بحريته.. فالكثير في مجتمعنا.. يفتقد ذلك الشعور المميز..

ففي مجتمعنا الشرقي..  محدش بيسيب حد في حاله.. و كلنا يعلم القصة التي تتكرر 

يوميا.. قصة جحا و ولده و الحمار!!

على العكس في المجتمع الغربي.. فلا أحد يكترث بما تفعله..

يعني لو حضرتك مشيت في الشارع بالsafety shorts...

محدش هياخد باله.. أو هياخد باله بس مش هيهتم أصلاً !! :-)

اللهم إلا إذا كنت شخصية عامة.. فتجد الباباراتزي لازقين لحضرتك..

و إذا تكلمنا عن مصرنا الحبيبة... ف كلنا باباراتزي style..

"شوف البنت دي لبسة ايه.." ،


"ايه اللي هو عامله في شعره ده " ،


" ايه ده.. شوفي سوسن و نادية مسلموش على بعض.. يبقى حوار أدهم كان صح!!" ، و إلخ إلخ..




اللي احنا عاوزين نوصله.. ان حضرتك و انت بتمارس حريتك.. ماتمارسهاش أوي.. أو بمعنى أصح.. مارسها صح.. عشان العين عليك يا باشا..!!

*********************

الحرية السليمة

الحرية السليمة هي ان تفعل ما تريد.. بما يتفق مع ما حولك..

يعني مثلاً..


ما ينفعش تلبس بدلة غطس...

و انت رايح تقابل المدير بتاعك ،، 

لأن الناس ببساطة هتقول عليك CRAZY (أي مجنون)

و راكبك GHOST (أي عفريت)!

اذن..

علشان تتصرف صح.. لازم تعرف الأول...

ايه الصح..

و ايه الغلط..

ايه حقوقك..

و ايه واجباتك..

و زي ما قال غسان مطر..

اعمل الصح

اما بقى لو مش عارف الصح.. من الغلط..

يبقى حضرتك غير أهل للحرية.. و متستاهلهاش!!

انت حر ما لم تضر..

للحرية... معني جميل أوي.. 

بس للأسف سوء استخدامه أفسد هذا المعني الراقي.. فإنحدر في أذهان البعض إلي درجة الإنحلال.. 

الحرية مش كده

أسوأ ما في الأمور ان يترك أولي الأمر الحبل على الغارب.. 

فما يحدث اليوم في مجتمعنا.. هو سوء استخدام الحريات و عدم فهمها.. 

فتجد الشاب ذو الثالثة عشر ربيعا.. يدخن السيجارة.. من منطلق أنا راجل.. أنا حر.. 

هل الحرية ان تضر نفسك؟؟ 

لأ يا سيدي انت مش حر.. انت منحرف عن الطريق السليم و تسيء استخدام حريتك بل و يجب تقويمك!! 

الانفتاح و الحرية 

أما أكثر ما يقلقني.. انتقال الثقافة الغربية إلى بلادنا انتقال سريع و بدون رقابة.. 

أنا لست ضد التأثر بالثقافات الآخرى.. و لكن علينا ان نأخذ ما يناسبنا.. 

أنا بطبيعة عملي.. (صيدلي) أتعامل مع مختلف فئات المجتمع.. 

جاءني في أحد المرات فتاتين شابتين في العشرينات من عمرهما.. 

احدهما قالت: " يا دكتور صاحبتي عملت تحليل و طلعت حامل.. عاوزين حاجة تنزل الجنين."! 

بغض النظر عن كيفية تصرفي.. فقد شدتني جملة قالتها.. قالت لصديقتها.. "متقلقيش يا بنتي، الكلام ده عادي خالص، كل البنات دلوقتي كده" !! 

فالواضح من الكلام ان الأولى متعودة دايما.. و صديقتها لسة جديدة.. و لكن ما أقلقني.. انهم لا يفعلون ذلك بمقابل مادي.. و لكنهم يفعلون ما يفعلون مع أصدقاءهم للمتعة!! و ما أقلقني أكثر.. إنهم كان شكلهم بنات ناس.. !! 

فهل وصل بنا الأمر إلى ذلك؟؟ هل انتقلت إلينا ثقافة.. الجنس قبل الزواج؟؟ 

بالتأكيد هذه قلة قليلة.. و لكن كيف نمنع هذه القلة من تكوين ظاهرة كارثية؟؟

إنها ليست حرية.. إنها إنعدام تربية.. إنها الإنحلال الأخلاقي ذاته..

فقد أصبح مشهد شبه طبيعي ان ترى الفتيات يقبلون الشباب و العكس.. و مشهد طبيعي.. في بعض الاماكن.. أن يجلس الجنسين.. في أوضاع لا توصف إلا بالشاذة.. على الأقل على مجتمعنا !!

فليذهب الإنفتاح الى الجحيم إذا كان سيدمر شبابنا.. 

الحرية مش كده..

الحرية مش إنك تتحدى أهلك ع الفاضي و المليان..

الحرية مش إنك ترجع البيت وش الصبح..

الحرية مش كيف و مخدرات..

الحرية مش معاكسة بنات..

الحرية مش إنك تلبسي هدوم تقلل من احترام الناس ليكي..

الحرية مش إنك تكتب عبارات بذيئة على الجدران..

الحرية مش حاجات كتيرة احنا بنعملها..

الحرية مش حكم الشارع.. 

الحرية مش حكم الشارع..

الحرية مش إنحلال..

" اذا كنتم تنادون بالحرية و تبغونها.. فإفهموها أولا.. و لا تجعلوها منفذ للشيطان.. فتصبحون لأهواءكم عابدين!! "